Jos 24 | Ndebele | STEP | UJoshuwa wasebuthanisa zonke izizwe zakoIsrayeli eShekema , wabiza abadala bakoIsrayeli lenhloko zabo labahluleli babo lenduna zabo , bazimisa phambi kukaNkulunkulu .

1 UJoshuwa wasebuthanisa zonke izizwe zakoIsrayeli eShekema ^a, wabiza abadala bakoIsrayeli ^b lenhloko zabo labahluleli babo lenduna zabo ^c, bazimisa phambi kukaNkulunkulu ^d. 2 UJoshuwa wasesithi kubo bonke abantu: Itsho njalo iNkosi, uNkulunkulu kaIsrayeli: Endulo oyihlo babehlala ngaphetsheya komfula ^e, uTera uyise kaAbrahama loyise kaNahori, babekhonza abanye onkulunkulu. 3 Ngasengimthatha uyihlo uAbrahama ngimsusa ngaphetsheya komfula ^f, ngamhambisa wadabula elizweni lonke leKhanani, ngayandisa inzalo yakhe, ngamnika uIsaka ^g. 4 LakuIsaka nganika uJakobe loEsawu ^h. LakuEsawu nganika intaba yeSeyiri ⁱ ukudla ilifa layo, kodwa uJakobe labantwana bakhe behlela eGibhithe ^j. 5 Ngasengithuma uMozisi loAroni ^k, ngatshaya iGibhithe ^l, njengalokho engakwenzayo phakathi kwayo; lemva kwalokho ngalikhupha. 6 Ngasengibakhupha oyihlo eGibhithe ^m, lafika elwandle ⁿ, amaGibhithe asexotshana lani ngenqola langamabhiza aze afika eLwandle oluBomvu ^o. 7 Kwathi bekhala eNkosini ^p, yabeka umnyama phakathi kwenu lamaGibhithe ^q, yaletha ulwandle phezu kwabo ^r, yabasibekela. Lamehlo enu abona engakwenza eGibhithe ^s. Lahlala enkangala insuku ezinengi ^t. 8 Ngasengililetha elizweni lamaAmori ayehlala ngaphetsheya kweJordani, asesilwa lani ^u, ngawanikela esandleni senu, lalidla ilifa lelizwe lawo, ngawachitha phambi kwenu. 9 UBalaki indodana kaZipori ^v inkosi yakoMowabi wasesukuma walwa loIsrayeli, wathuma wabiza uBalami indodana kaBeyori ukuthi aliqalekise ^w. 10 Kodwa kangithandanga ukulalela uBalami ^x; ngakho walibusisa lokulibusisa ^y, ngasengilikhulula esandleni sakhe. 11 Lachapha iJordani ^z, lafika eJeriko, izakhamizi ^aa zeJeriko zalwa zimelene lani ^ab, amaAmori, lamaPerizi, lamaKhanani, lamaHethi, lamaGirigashi, amaHivi, lamaJebusi; ngawanikela esandleni senu. 12 Ngathuma olonyovu phambi kwenu ^ac abawaxotsha phambi kwenu, amakhosi amabili amaAmori; hatshi ngenkemba yakho ^ad njalo hatshi ngedandili lakho. 13 Ngasengilinika ilizwe elingalisebenzelanga, lemizi elingayakhanga ^ae, lihlala kiyo. Lidla okwezivini lezivande zemihlwathi elingakuhlanyelanga.

14 Khathesi-ke yesabeni iNkosi ^af, liyikhonze ngobuqotho langeqiniso ^ag, lisuse onkulunkulu oyihlo ababakhonza ngaphetsheya komfula ^ah leGibhithe ^ai, njalo likhonze iNkosi. 15 Uba-ke kukubi emehlweni enu ukuyikhonza iNkosi, zikhetheleni lamuhla lowo elizamkhonza ^aj; kumbe onkulunkulu ababakhonzayo oyihlo ababengaphetsheya komfula ^ak, loba onkulunkulu bamaAmori ^al elihlala elizweni lawo. Kodwa mina lendlu yami sizayikhonza iNkosi ^am.

16 Basebephendula abantu besithi: Kakube khatshana lathi ukuthi sitshiye iNkosi, sikhonze abanye onkulunkulu. 17 Ngoba iNkosi uNkulunkulu wethu iyiyo eyasenyusayo labobaba sivela elizweni leGibhithe, endlini yobugqili ^an, eyenza phambi kwamehlo ethu lezizibonakaliso ezinkulu, yasilondoloza endleleni yonke esahamba kiyo, laphakathi kwabo bonke abantu esedlule phakathi kwabo. 18 INkosi yasixotsha phambi kwethu zonke izizwe, lamaAmori ayehlala elizweni. Thina lathi sizayikhonza iNkosi, ngoba inguNkulunkulu wethu. 19 UJoshuwa wasesithi ebantwini: Kalilakuyikhonza iNkosi ^ao, ngoba inguNkulunkulu ongcwele ^ap, inguNkulunkulu olobukhwele ^aq. Kayiyikuthethelela iziphambeko zenu lezono zenu ^ar. 20 Uba liyitshiya iNkosi ^as likhonze onkulunkulu abezizwe, izaphenduka yenze okubi kini ^at, iliqede, emva kokuthi ilenzele okuhle. 21 Abantu basebesithi kuJoshuwa: Hatshi, kodwa sizayikhonza iNkosi. 22 UJoshuwa wasesithi ebantwini: Lingabafakazi ngani ukuthi lina lizikhethele iNkosi ^au ukuyikhonza. Basebesithi: Singabafakazi. 23 Khathesi-ke, susani ^av onkulunkulu abezizwe abaphakathi kwenu, lithobele inhliziyo yenu eNkosini, uNkulunkulu kaIsrayeli. 24 Abantu basebesithi kuJoshuwa: INkosi uNkulunkulu wethu sizayikhonza, lelizwi layo sililalele. 25 Ngakho uJoshuwa wasebenzela abantu isivumelwano ngalolosuku ^aw, wababekela isimiso lesimiselo ^ax eShekema.

26 UJoshuwa wasebhala lawomazwi egwalweni lomlayo kaNkulunkulu ^ay; wathatha ilitshe elikhulu ^az, walimisa lapho ngaphansi kwesihlahla se-okhi ^ba elingasendlini engcwele yeNkosi. 27 UJoshuwa wasesithi ebantwini bonke: Khangelani, lelilitshe lizakuba yibufakazi ngathi ^bb, ngoba liwezwile wonke amazwi eNkosi eyawakhuluma kithi ^bc; ngakho lizakuba yibufakazi ngani, hlezi lenze inkohliso kuNkulunkulu wenu ^bd. 28 UJoshuwa wasebayekela abantu ukuthi bahambe ^be, ngulowo lalowo waya elifeni lakhe.

Ukufa kukaJoshuwa lokukaEleyazare

29 Kwasekusithi emva kwalezizinto uJoshuwa indodana kaNuni, inceku yeNkosi, wafa eleminyaka elikhulu letshumi. 30 Basebemngcwabela emngceleni welifa lakhe eThiminathi-Sera ^bf esentabeni yakoEfrayimi enyakatho kwentaba iGahashi ^bg. 31 Njalo uIsrayeli wayikhonza iNkosi zonke izinsuku zikaJoshuwa lazo zonke izinsuku zabadala abelula insuku emva kukaJoshuwa, njalo ababewazi wonke umsebenzi weNkosi ^bh eyawenzela uIsrayeli.

32 Lamathambo kaJosefa ^bi abantwana bakoIsrayeli ababenyuke lawo bevela eGibhithe bawangcwaba eShekema, esiqintini sensimu uJakobe asithenga kubantwana bakaHamori uyise kaShekema ^bj ngenhlamvu zesiliva ezilikhulu; saba-ke yilifa labantwana bakoJosefa. 33 UEleyazare indodana kaAroni wasesifa, bamngcwaba eqaqeni lukaPhinehasi indodana yakhe ^bk, ayeluphiwe entabeni yakoEfrayimi ^bl.